କେନ୍ଦ୍ରାପଡ଼ା, ତା ୦୮/୦୧: ସିକିମ ସତ୍ୱ ଜମି ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟ ସରକାରଙ୍କ ଐତିହାସିକ ନିଷ୍ପତି ପରେ କେନ୍ଦ୍ରାପଡ଼ା ଜିଲ୍ଲାପାଳ ଅମ୍ରିତ୍ ଋତୁରାଜ ଦୃଢ଼ ପଦକ୍ଷେପ ଗ୍ରହଣ କରିଛନ୍ତି । ରାଜସ୍ୱ ବିଭାଗ ନିର୍ଦ୍ଦେଶକ୍ରମେ ଜିଲ୍ଲାର ୧୦,୧୫୦ ସିକିମ ସତ୍ୱର ସମସ୍ୟା ସମାଧାନ ପାଇଁ ଜିଲ୍ଲାପାଳ ସମସ୍ତ ତହସିଲ୍ଦାର, ଅତିରିକ୍ତ ତହସିଲଦାର, ରାଜସ୍ୱ ନିରୀକ୍ଷକମାନଙ୍କୁ ତ୍ୱରିତ ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଛନ୍ତି ।
ସୂଚନାଯୋଗ୍ୟ, ଓଡ଼ିଶା ଭୂସଂସ୍କାର ଆଇନ-୧୯୬୦ ଅନୁସାରେ ସିକିମ ଜମିରେ ରୟତି ଘୋଷଣା ନିମନ୍ତେ ଆବେଦନ କରିବାର ଶେଷ ଅବଧି ୧୯୭୭ ମସିହା ପର୍ଯ୍ୟନ୍ତ ରହିଥିଲା । ମାତ୍ର ଏହି ସମୟ ଅବଧି ମଧ୍ୟରେ ଜିଲ୍ଲାର ସମସ୍ତ ସିକିମ ଚାଷୀ ଆବେଦନ କରପାରିନଥିଲେ । ଫଳରେ ସିକିମଭାବେ ରେକର୍ଡ଼ଭୁକ୍ତ ହୋଇଥିବା ଜମିକୁ ଜବରଦଖଲ କରୁଥିବା ଉପ-ରୟତ କିମ୍ବା ଅଧସ୍ତନ ରୟତ ଅଥବା ସେମାନଙ୍କ ଉତରାଧିକାରୀଙ୍କୁ ସେହି ଜମି ଉପରେ ରୟତି ଅଧିକାର ମିଳିପାରିନଥିଲା । ଓଡ଼ିଶା ଭୂସଂସ୍କାର ଆଇନ-୧୯୬୦ର ଆବଶ୍ୟକୀୟ ସଂଶୋଧନ ପରେ ଏବେ ଯେଉଁମାନେ ସିକିମ୍ ଜମିକୁ ଚାଷ ବା ବାସଗୃହଭାବେ ବ୍ୟବହାର କରୁଛନ୍ତି, ସେହି ଜମିର ରୟତି ଅଧିକାର ପାଇବା ପାଇଁ ରାଜସ୍ୱ ଅଧିକାରୀଙ୍କ ନିକଟରେ ସଂପୃକ୍ତ ଚାଷୀମାନେ ଆବେଦନ କରିପାରିବେ । ତହସିଲଦାରମାନେ ମଧ୍ୟ ସ୍ୱତଃପୂର୍ତଭାବେ ସିକିମଭାବେ ରେକର୍ଡ଼ ହୋଇଥିବା ଜମିକୁ ଦଖଲ କରୁଥିବା ଉପ-ରୟତ କିମ୍ବା ଅଧସ୍ତନ ରୟତ ଅଥବା ସେମାନଙ୍କ ଉତରାଧିକାରୀକୁ ସେହି ଜମି ଉପରେ ରୟତି ଅଧିକାର ଦେବା ପାଇଁ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରିପାରିବେ । ଏହି କ୍ରମରେ ତହସିଲଦାର, ଅତିରିକ୍ତ ତହସିଲଦାର, ରାଜସ୍ୱ ନିରୀକ୍ଷକମାନଙ୍କ ସହ ବୈଠକ କରି ସମସ୍ତ ସିକିମ ଖାତାଗୁଡ଼ିକୁ ଓଏଲ୍ଆର୍ ଆକ୍ଟ ଅନୁସାରେ ତିନି ଦିନ ମଧ୍ୟରେ ଦାଖଲ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଚଳିତମାସ ଶେଷ ସୁଦ୍ଧା ସମସ୍ତ କେସ୍ ଫଇସଲା କରିବାକୁ ସେ ମଧ୍ୟ ନିର୍ଦ୍ଦେଶ ଦେଇଛନ୍ତି । ଉକ୍ତ ବୈଠକରେ ଅତିରିକ୍ତ ଜିଲ୍ଲାପାଳ (ରାଜସ୍ୱ) ନିଲୁ ମହାପାତ୍ର, ଉପଜିଲ୍ଲାପାଳ ରବିନ୍ଦ୍ର କୁମାର ପ୍ରଧାନ, ଡେପୁଟି କଲେକ୍ଟର(ରେଭେନ୍ୟୁ) କୁଇନି ଜେନା ଉପସ୍ଥିତ ଥିଲେ । ସୂଚନାଯୋଗ୍ୟ ଯେ, ରାଜସ୍ୱ ଅଧିକାରୀମାନେ ଆଦେଶନାମା ଜାରି କରିବା ବେଳେ ସରକାରଙ୍କ ଦ୍ୱାରା ନିର୍ଦ୍ଧାରିତ ଅର୍ଥରାଶି ଅନୁସାରେ କ୍ଷତିପୂରଣ ସ୍ଥିର କରିବେ । ସିକିମ୍ ଜମି ଉପରେ ଉପ-ରୟତ କିମ୍ବା ଅଧସ୍ତନ ରୟତ କିମ୍ବା ସେମାନଙ୍କ ଉତରାଧିକାରୀମାନେ ରୟତଭାବେ ଘୋଷିତ ହେବା ପରେ ସେମାନଙ୍କୁ ସେହି ଜମି ଉପରେ ବଂଶାନୁକ୍ରମିକ ଓ ହସ୍ତାନ୍ତରଯୋଗ୍ୟ ଅଧିକାର ମିଳିବ ।
