କେନ୍ଦ୍ରାପଡ଼ା,୧ା୧୧-ଚଳିତ ବର୍ଷ ପାଗ ଅନୁକୂଳ ଥିବାରୁ କେନ୍ଦ୍ରାପଡାର ଗଣପର୍ବ ଗଜଲକ୍ଷ୍ମୀ ପୂଜାରେ ଆରମ୍ଭରୁ ପ୍ରବଳ ଜନ ସମାଗମ ଲାଗିରହିଛି । ସାଜସଜା ସାଙ୍ଗକୁ ମିନା ବଜାର ଏବଂ ପିଲାମାନଙ୍କ ଖେଳକୁଦ ପ୍ରଦର୍ଶନୀ ଯାତ୍ରୀମାନଙ୍କୁ ଆକର୍ଷିତ କରିଛି । ଏହି ସ୍ଥିତିର ସୁବିଧା ନେବାକୁ ରାଜନେତାମାନେ ଭୁଲି ନାହାଁନ୍ତି । ଆଗାମୀ କିଛି ମାସ ପରେ ସାଧାରଣ ନିର୍ବାଚନ ଅନୁଷ୍ଠିତ ହେବାକୁ ଯାଉଥିବାରୁ ବିଧାୟକ ଆଶାୟୀମାନେ ମା’ଲକ୍ଷ୍ମୀଙ୍କ ଆଶୀର୍ବାଦ ପୂଜା କମିଟିମାନଙ୍କର ସହଯୋଗ କାମନା କରିଛନ୍ତି । ଗଜଲକ୍ଷ୍ମୀ ପୂଜାର ପଞ୍ଚମ ଦିନରେ ଆଶାୟୀଙ୍କ ଅଧିକ ଭିଡ ଦେଖିବାକୁ ମିଳିଥିଲା । ପୂର୍ବାହ୍ନରେ ପୂର୍ବତନ ବିଜେଡି ବିଧାୟକ କିଶୋର ଚନ୍ଦ୍ର ତରାଇ ତାଙ୍କ ସମର୍ଥକଙ୍କ ସହିତ କେନ୍ଦ୍ରାପଡା ସହରର ବିଭିନ୍ନ ପୂଜା ମଣ୍ଡପ ବୁଲିଥିଲେ । ପୂଜା କମିଟି ସଦସ୍ୟମାନେ ତାଙ୍କୁ ସ୍ୱାଗତ କରିବାର ଦେଖାଯାଇଥିଲା । ସନ୍ଧ୍ୟାରେ ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା କଂଗ୍ରେସ କର୍ମୀମାନଙ୍କ ସହିତ ମଣ୍ଡପ ବୁଲି ଜନ ସମ୍ପର୍କ ବୃଦ୍ଧି କରିବାକୁ ଉଦ୍ୟମ କରିଥିଲେ । ଗତକାଲି ପୂର୍ବତନ ବିଜେଡି ବିଧାୟକ ଡଃ ସିପ୍ରା ମଲ୍ଲିକ ତାଙ୍କ ସମର୍ଥକଙ୍କ ସହିତ ପୂଜା ମଣ୍ଡପ ବୁଲିବାର ଦେଖାଯାଇଥିଲା । ଅନ୍ୟତମ ଆଶାୟୀ ବିଜେଡି ନେତ୍ରୀ ଜିଲ୍ଲା ପରିଷଦ ସଭାପତି ଗୀତାଞ୍ଜଳୀ ସେଠୀ କପାଳେଶ୍ୱର ଗ୍ରାମ ପଞ୍ଚାୟତର ପୂଜା ମଣ୍ଡପରେ ବୁଲିବାର ଦେଖାଯାଇଥିଲା । ବିଜେଡିରିଜେଡିର ଏକାଧିକ ଆଶାୟୀ ପୂଜାରେ ବୁଲୁଥିବା ବେଳେ କଂଗ୍ରେସର ଏକମାତ୍ର ଆଶାୟୀ ଦେଖିବାକୁ ମିଳିଛି । ବିଜେପି ଆଶାୟୀ କେତେ ଆଉ ବାକି ଥିବା ଦୁଇଦିନ ପୂଜାରୁ ଜଣା ପଡିବ ବୋଲି ଆଶା କରାଯାଉଛି ।
