କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇ ପୌରାଂଚଳ ଅନ୍ତର୍ଗତ ବେଲତଳ ଗ୍ରାମର ଅଜିତ କୁମାର ଦାଶଙ୍କ ୨ ବଖରା ଘର ଗତକାଲି ବିଳମ୍ବିତ ରାତିରେ ପୋଡିପାଉଁଶ ହୋଇଯାଇଛି । ଫଳରେ ଘର ମଧ୍ୟରେ ଥିବା ସମସ୍ତ ଜିନିଷପତ୍ର ପୋଡି ହୋଇଯାଇଛି । ଅଗ୍ନିକାଣ୍ଡର କାରଣ ଜଣାପଡିନଥିବା ବେଳେ, ଆନୁମାନିକ ୧୦ ଲକ୍ଷ ଟଙ୍କା ସମ୍ପତି ଜଳିପୋଡି ପାଉଁଶ ହୋଇଯାଇଛି ବୋଲି କୁହାଯାଉଛି ।
ମିଳିଥିବା ସୂଚନା ଅନୁସାରେ ଗତକାଲି ବିଳମ୍ବିତ ରାତ୍ରିରେ ହଠାତ୍ ଅଜିତଙ୍କ ଘର ହୁତୁ ହୁତୁ ହୋଇ ଉଗ୍ରରୂପ ନେଇଥିଲା । ଏହା ଦେଖି ଘରଲୋକେ ସହାୟତା ପାଇଁ ଡାକ ପକାଇ ଥିଲେ । ନିଆଁର ପ୍ରକୋପ ଏତେ ଥିଲା ଯେ ପୋଖରୀରୁ ପାଣି ଆଣି ନିଆଁ କୁ ଆୟତ କରିବା ସମ୍ଭବ ନ ଥିଲା ।ତୁରନ୍ତ ପଟ୍ଟାମୁଣ୍ଡାଇ ଦମକଳ କେନ୍ଦ୍ରକୁ ଫୋନ କରିଥିଲେ ମଧ୍ୟ କେହି ଫୋନ ଉଠାଇନଥିଲେ । ଲୋକେ ମଟର ସାଇକେଲ ଯୋଗେ ଖବର ଦେବା ପରେ ଦମକଳ ଗାଡି ଢେର୍ ବିଳମ୍ବରେ ପହଁଚିଥିଲା ବେଳକୁ ନିଆଁ ପ୍ରକୋପରେ ୨ ବଖରା ଘର ଭସ୍ମୀଭୂତ ହୋଇ ସାରିଥିଲା ବୋଲି ପ୍ରତ୍ୟକ୍ଷଦର୍ଶୀ ଅଞନ ଦାଶ କହିଛନ୍ତି । ତେବେ ଗତକାଲି ନୂଆ ବର୍ଷ ପାଇଁ ଦମକଳ କର୍ମଚାରୀ ବ୍ୟାସ୍ତଥିବାରୁ ଗାଡି ନେଇ ଆସିବା ବିଳମ୍ବ ହୋଇଛି ବୋଲି ଜଣାପଡିଛି । ନିଆଁ କେମିତି ଲାଗିଲା ଜଣା ପଡି ନ ଥିଲେ ମଧ୍ୟ ଅଗ୍ନିକାଣ୍ଡରେ ଘର ମଧ୍ୟରେ ଥିବା ସମସ୍ତ ଆସବାବପତ୍ର, ବସ୍ତା ଧାନ,ଚାଉଳ, ପଲଙ୍କ,ଖଟ, କଂସା ବାସନ, ଗହଣାଗାଣ୍ଠି, ଅଜିତ କରିଥିବା ଟେଣ୍ଡହାଉସ କପଡା ଓ ଅନ୍ୟାନ ସାମନ୍, ସାଇକେଲ, ଟିଭି,ସମସ୍ତ କାଗଜପତ୍ର ପୋଡି ହୋଇ ପାଉଁଶ ହୋଇ ଯାଇଛି । ସଦର ଭାରାପ୍ରାପ୍ତ ଆରଆଇ ସାରାମଣୀ ସୋରୋନ ପ୍ରାଥମିକ ତଦନ୍ତ କରି ଫେରଯାଇଥିଲେ ବି ସରକାରୀ ନିୟମାନୁସାରେ ସମସ୍ତ ସହାୟତା ପ୍ରଦାନ କରା ଯିବ ବୋଲି ପ୍ରତିଶ୍ରୁତି ଦେଇଥିଲେ ।
