ଟ୍ରକକୁ ପିଟିଲା ବାଇକ : ୨ ଗୁରୁତର, ୧ ଆହତ

କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ସହର ନିକଟ କାକୁଡିପଲ୍ଲୀ ଛକ ଠାରେ ଟ୍ରକ ପଛରେ ବାଇକ୍ ଧକ୍କା ଦେବାରୁ ୩ ଜଣ ଗୁରୁତର ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ୨ ଗୁରୁତରଙ୍କୁ କେନ୍ଦ୍ରାପଡା ସ୍ଥାନାନ୍ତର କରାଯାଇଛି । ସେମାନେ ହେଲେ ସ୍ଥାନୀୟ ନିମପୁର ଗାଁର ଜିସୁକ୍ରିଷ୍ଣ ବାରିକ, କାହ୍ନୁଚରଣ ବାରିକ, ନାରାୟଣ ବାରିକ ବୋଲି ଜଣାପଡିଛି । ସୂଚନା ଅନୁଯାୟୀ ବୁଧବାର ପୂର୍ବାହ୍ନରେ ପଟ୍ଟାମୁଣ୍ଡାଇ ବଜାରରୁ ଏକ ବାଇକରେ ୩ ଜଣ ଆରୋହୀ ପଟ୍ଟାମୁଣ୍ଡାଇ-ରାଜନଗର ପୁରୁଣା ରାସ୍ତାରେ ନିମପୁର ଆଡକୁ ଯାଉଥିଲେ । ରାଜନଗର ଅଭିମୁଖେ ଯାଉଥିବା ଏକ ଆଇଚର ଟ୍ରକ ହଠାତ୍ କାକୁଡିପଲ୍ଲୀ ନିକଟରାସ୍ତାରେ ବ୍ରେକ କରି ଦେବାରୁ ପଛରୁ ଆସୁଥିବା ଏହି ବାଇକଟି ଖୁବ ଯୋରରେପିଟି ହୋଇଥିଲା । ଫଳରେ ଘଟଣାସ୍ଥଳରେ ବାଇକ୍ ଚାଳକ ଓ ପଛରେ ବସିଥିବା ୨ ସହଯୋଗୀ ଟ୍ରକରେ ବାଡ଼େଇ ତଳେ ପଡ଼ିଯାଇଥିଲେ । ସେହି ସମୟରେ ପଛପଟୁ ଆସୁଥିବା ଅନ୍ୟଏକ ବାଇକ ତାଙ୍କୁ ଧକ୍କାଦେଇ ଚାଲିଯାଇଥିବା ଉପସ୍ଥିତ ଲୋକେ କହିଛନ୍ତି । ୩ ଗୁରୁତର ଆହତଙ୍କୁ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ପଟ୍ଟାମୁଣ୍ଡାଇ ଉପଖଣ୍ଡ ସ୍ତରିୟ ଡାକ୍ତରଖାନାକୁ ଅଣାଯାଇ ଚିକିତ୍ସିତ କରାଯାଇଛି । ସେମାନଙ୍କ ମଧ୍ୟରେ ୨ ଜଣ ଗୁରୁତର ହୋଇଥିବା ବେଳେ ଅନ୍ୟ ଜଣେ ଆହତ ହୋଇଥିବା ଜଣାପଡ଼ିଛି । ପୋଲିସ ବାଇକ ଓ ଟ୍ରକକୁ ଜବତ କରି ଘଟଣାର ଅଧିକ ତଦନ୍ତ କରୁଛି ।