ଶ୍ରୀ ରାଧା ଗୋବିନ୍ଦ ଜୀୟୁଙ୍କ ବସନ୍ତ ଉତ୍ସବ

କେନ୍ଦ୍ରାପଡ଼ା,୨୩ା୧: କେନ୍ଦ୍ରାପଡା ଜିଲ୍ଲା ପ୍ରସିଦ୍ଧ ଆରାଧ୍ୟ ସହରର ଚାଟରାପାଟଣାସ୍ଥିତ ଶ୍ରୀ ରାଧା ଗୋବିନ୍ଦ ଜୀୟୁ ମନ୍ଦିରର ଶ୍ରୀ ରାଧା ଗୋବିନ୍ଦଙ୍କ ବସନ୍ତ ଉତ୍ସବ ମହା ସମାରୋହରେ ଅନୁଷ୍ଠିତ ହୋଇଯାଇଛି । ପରମ୍ପରା ଅନୁଯାଇ ଓଢଣ ଷଷ୍ଠିଠାରୁ ବସନ୍ତ ପଞ୍ଚମୀ ପର୍ଯ୍ୟନ୍ତ ଶୀତ ଦାଉରୁ ରକ୍ଷାପାଇବା ପାଇଁ ଶ୍ରୀଜୀୟୁ ଶୀତ ବସ୍ତ୍ର ଘୋଡିଲାଗି ହୋଇଥାନ୍ତି । ବସନ୍ତ ପଞ୍ଚମିରେ ବସନ୍ତ ଋତୁ ଆଗମନରେ ରାଧା ଗୋବିନ୍ଦ ଜୀୟୁ ତାଙ୍କ ଅଷ୍ଠସଖାମାନଙ୍କ ସହିତ ବସନ୍ତ ମଣ୍ଡପ ଯାଇ ବସନ୍ତ ପବନ ଉପଭୋଗ କରିଥାନ୍ତି । ଏହାକୁ ଆଧାର କରି ଅପରାହ୍ନ ଉଠାଣି ଦୀପ ପରେ ଶ୍ରୀଜୀୟୁ ମନ୍ଦିରରୁ ବସନ୍ତ ବଗିଚା ଯାଇ ସେଠାରେ ଉପବିଷ୍ଠ ହୋଇଥିଲେ । ଏହିଠାରେ ଉଠାଣି ଦୀପ, ସନ୍ଧ୍ୟା ଆଳତୀ, ୩୨ଟି ବତୀରେ ବସନ୍ତ ବଗିଚା ଆଳତୀ ହୋଇଥିଲା ବୋଲି ବଡ ପଣ୍ଡା ସୁଶାନ୍ତ ପଣ୍ଡା ସୂଚନା ଦେଇଥିଲେ । ରାତିରେ ମନ୍ଦିରକୁ ଶ୍ରୀ ଜୀୟୁ ପ୍ରବେଶ କରିଥିଲେ । ପୌରସଭ୍ୟ ରମେଶ ଦାସଙ୍କ ତତ୍ୱାବଧାନରେ ମନ୍ଦିର ପରିଚାଳନା ଟ୍ରଷ୍ଟି ବାସୁଦେବ ପାଣି, ଅନୁପ ନାୟକ, ସୁକାନ୍ତ ବାରିକ, ମଶାଲ ସେବାୟତ ନାରଣ ବାରିକ, ବୃନ୍ଦାବନ ସ୍ୱାଇଁ, ସୋମନାଥ ଦାସ, ପ୍ରଶାନ୍ତ ନାୟକ, ଚକ୍ରଧର ବାରିକ ପ୍ରମୁଖ ଏହି କାର୍ଯ୍ୟକ୍ରମ ପରିଚାଳନା କରିଥିଲେ ।