ବଳଦେବ ଉଚ୍ଚ ବିଦ୍ୟାଳୟ ୧୯୯୮ ବ୍ୟାଚ୍‌ର ବନ୍ଧୁମିଳନ

କେନ୍ଦ୍ରାପଡା,୨୦/୬: କେନ୍ଦ୍ରାପଡ଼ା ଜିଲ୍ଲାସ୍ଥିତ ବଳଦେବ ଉଚ୍ଚ ବିଦ୍ୟାଳୟ ୧୯୯୮ ବ୍ୟାଚ୍‌ର ବନ୍ଧୁମିଳନ କାର୍ଯ୍ୟକ୍ରମ ବହୁ ଆଡମ୍ବର ସହ ବଡ ମଙ୍ଗଳା ସ୍ଥିତ ଏକ ମଣ୍ଡପରେ ପାଳନ କରାଯାଇଛି । ସେଥିରେ ସମସ୍ତ ପୂର୍ବତନ ଶିକ୍ଷକବୃନ୍ଦ ନରହରି ସାର, ପୁରୁଷୋତ୍ତମ ସାର୍‌, ବନମାଳୀ ସାର୍‌, ପ୍ରତାପ ସାର୍‌, ହରେକୃଷ୍ଣ ସାର୍‌, ଚିରରଞ୍ଜନ ସାର୍‌ମାନଙ୍କ ସହିତ ସ୍ୱର୍ଗତଃ ରାଧାକୃଷ୍ଣ ସାର, ରଞ୍ଜନ ସାର୍‌, ଦେବ ସାର୍‌, ନିରାକାର ସାର୍ ଓ ଅନ୍ତ ସାର୍‌ଙ୍କ ପରିବାରର ସଦସ୍ୟ ଯୋଗଦାନ କରି କାର୍ଯ୍ୟକ୍ରମ ଶୋଭା ବଢେଇଥିଲେ । ଛାତ୍ରଛାତ୍ରୀମାନଙ୍କ ଦ୍ୱାରା ଶିକ୍ଷକ ଏବଂ ସ୍ୱର୍ଗତ ଶିକ୍ଷକଙ୍କ ପରିବାର ସଦସ୍ୟଙ୍କୁ ସମ୍ମାନିତ କରାଯାଇଥିଲା । ଚିରରଞ୍ଜନ ସାର୍ ଏବଂ ପୁରୁଷୋତ୍ତମ ସାର୍ ଛାତ୍ରଛାତ୍ରୀମାନଙ୍କ ଉଦ୍ଦେଶ୍ୟରେ ବକ୍ତବ୍ୟ ପ୍ରଦାନ କରିଥିଲେ । ବକ୍ତବ୍ୟ ଶେଷରେ ଚିରରଞ୍ଜନ ସାର୍ ନିଜ ଲିଖିତ କବିତା ଛାତ୍ରଛାତ୍ରୀମାନଙ୍କୁ ଭେଟି ଦେଇଥିଲେ । ଏହା ପିଲାମାନଙ୍କ ମନରେ ଆନନ୍ଦର ଲହରୀ ଖେଳେଇ ଦେଇଥିଲା । ଦୀର୍ଘ ୨୬ବର୍ଷ ବିତି ଯାଇଥିଲେ ମଧ୍ୟ ଗୁରୁଶିଷ୍ୟଙ୍କ ସମ୍ପର୍କ ଅତୁଟ ଏବଂ ମଧୁର ବୋଲି ପ୍ରମାଣିତ ହୋଇଥିଲା । ଜିଲ୍ଲା, ରାଜ୍ୟ ଏବଂ ଦେଶ ବାହାରର ସହପାଠୀମାନେ ତାଙ୍କ ବ୍ୟସ୍ତବହୁଳ ଜୀବନରୁ ବିରତି ନେଇ ଏହି କାର୍ଯକ୍ରମରେ ଯୋଗଦାନ କରି ଏହାକୁ ସଫଳ କରିଥିଲେ । ସହପାଠୀମାନଙ୍କ ମଧ୍ୟରେ ଆନନ୍ଦ, ଉତ୍ସାହ ଏବଂ ଆନ୍ତରିକତା ଦେଖି ୨୬ବର୍ଷ ବ୍ୟବଧାନ ମାତ୍ର ୨୬ଦିନ ଭଳି ଅନୁଭୂତ ହୋଇଥିଲା । ବନ୍ଧୁମିଳନ କାର୍ଯକ୍ରମର ସୁତ୍ରଧର ଜୋସ୍ନାମୟୀଙ୍କ ବିଚାରକୁ ସତ୍ୟରେ ପରିଣତ କରିବା ପାଇଁ ବିଶ୍ୱଜିତ୍ ଏବଂ ପବିତ୍ରଙ୍କ ସହିତ ବିଭୁପ୍ରକାଶ ସାହୁ, ଭଗବାନ ଗୁରୁ ଏବଂ ରାଜେନ୍ଦ୍ର ନାୟକ ତାଙ୍କ ବହୁମୂଲ୍ୟ ସମୟ ବିନିଯୋଗ କରି ଏହାକୁ ସଫଳତାର ସ୍ୱାଦ ଚଖାଇଥିଲେ । ଏହି କାର୍ଯକ୍ରମ ପାଇଁ ବହୁ ଆଡମ୍ବରର ସାଜସ୍ୱଜା ସହ ସୁସ୍ୱାଦୁ ଖାଦ୍ୟପେୟ ତଥା ମନୋରଞ୍ଜନ କାର୍ଯକ୍ରମର ଆୟୋଜନ କରାଯାଇଥିଲା । ଏହି କାର୍ଯକ୍ରମରେ ସହପାଠୀମାନେ ନିଷ୍ପତ୍ତି ନେଇଥିଲେ ଯେ ଭବିଷ୍ୟତରେ ଏହି ବନ୍ଧୁମିଳନ ମାଧ୍ୟମରେ ସମସ୍ତଙ୍କ ସହ ଯୋଡ଼ି ହୋଇ ରହିବେ ଓ ପରସ୍ପରକୁ ସୁଖଦୁଃଖରେ ସହାୟତା କରିବେ ତଥା ମିଳିମିଶି କିଛି ଭଲ କାର୍ଯ୍ୟ କରିବାରେ ସମୟ ବିନିଯୋଗ କରିବେ । ଶେଷରେ ସହପାଠୀମାନେ ଏକ ଅଭୁଲା ସ୍ମୃତି ସାଥିରେ ନେଇ ବହୁ ଶୀଘ୍ର ପୁନଃମିଳନର ପ୍ରତିଶୃତି ଦେଇ ପରସ୍ପରଠାରୁ ବିଦାୟ ନେଇଥିଲେ ।