କେନ୍ଦ୍ରାପଡା, ୨୭/୬: କେନ୍ଦ୍ରାପଡା ଜିଲ୍ଲା ଆଇନ ସେବା ପ୍ରାଧିକରଣ ପକ୍ଷରୁ ଦୀନବନ୍ଧୁ ସାହୁ ଆଇନ ମହାବିଦ୍ୟାଳୟର ଶିକ୍ଷାନବିଶମାନଙ୍କୁ ଆଇନ ଶିକ୍ଷା ବିଷୟରେ ପ୍ରଶିକ୍ଷଣ ପ୍ରଦାନ କରାଯାଇଥିଲା । ଉକ୍ତ ପ୍ରଶିକ୍ଷଣ ଶିବିର ଦୀର୍ଘ ୨୦ଦିନ ବ୍ୟାପୀ ଚାଲିଥିଲା । ଏହି ପ୍ରଶିକ୍ଷଣ ଶିବିରକୁ ଜିଲ୍ଲା ଓ ଦୌରା ଜଜ୍ ବିଶ୍ୱଜିତ୍ ମହାନ୍ତି ଉଦ୍ଘାଟନ କରିଥିଲେ । ଏହି ଶିବିରକୁ ଜିଲ୍ଲା ଆଇନ ସେବା ପ୍ରାଧିକରଣର ସଚିବ ସୁମିତ୍ରା ସାହୁ ପରିଚାଳନା କରି ଫୌଜଦାରୀ ଓ ଦେୱାନୀ କୋର୍ଟର ଅଧିକାରୀମାନଙ୍କ ସହିତ କାର୍ଯ୍ୟ କରିବାକୁ ବିଭିନ୍ନ କୋର୍ଟ ପରିଦର୍ଶନ କରାଇଥିଲେ । ପ୍ରଶିକ୍ଷଣ ସମାପ୍ତ ପରେ ଶିକ୍ଷାନବିଶମାନଙ୍କୁ ମାନପତ୍ର ପ୍ରଦାନ କରାଯାଇଥିଲା । ଉକ୍ତ ମାନପତ୍ରକୁ ମହାବିଦ୍ୟାଳୟର ଅଧ୍ୟକ୍ଷ ଡଃ ରବୀନ୍ଦ୍ର କୁମାର ବଳଙ୍କ ଦ୍ୱାରା ଗତ ୨୧ତାରିଖ ଦିନ ସମସ୍ତ ଶିକ୍ଷାନବିଶମାନଙ୍କୁ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ପ୍ରଦାନ କରାଯାଇଥିଲା ।
