ମା’ ବନ୍ଧମଙ୍ଗଳାଙ୍କ ତୃତୀୟ ବାର୍ଷିକ ଉତ୍ସବ

କେନ୍ଦ୍ରାପଡା,୧୨ା୨: କେନ୍ଦ୍ରାପଡା ବ୍ଲକ ଗୁଲନଗର ପଞ୍ଚାୟତ ଅନ୍ତର୍ଗତ ରାମନଗରପାଟଣାସ୍ଥିତ ମା’ ବନ୍ଧମଙ୍ଗଳାଙ୍କ ତୃତୀୟ ବାର୍ଷିକ ଉତ୍ସବ ଚଳିତ ମାଘ ମାସ ଶୁକ୍ଳ ପକ୍ଷ ଦ୍ୱାଦଶୀ ତିଥିଠାରୁ ମାଘ ପୂର୍ଣ୍ଣିମା ପର୍ଯ୍ୟନ୍ତ ଅନୁଷ୍ଠିତ ହୋଇଯାଇଛି । ଏହି ଉପଲକ୍ଷେ ଗତ ରବିବାର ଦିନ ଅଙ୍କୁରାରୋପଣ କରାଯିବା ପରେ ସୋମବାର ଦିନ ଗ୍ରାମବାସୀଙ୍କ ଦ୍ୱାରା ଏକ କଳସ ଶୋଭାଯାତ୍ରାରେ ଗୋବରୀ ଘାଟରୁ ପାଣି ଆଣି ମଙ୍ଗଳା ମନ୍ଦିର ପରିସରରେ ଘଟ ସ୍ଥାପନ କରାଯିବା ପରେ ମୁଖ୍ୟ ପୁରୋହିତ ରଶ୍ମିରଞ୍ଜନ ପାଣି ଓ ସାଥୀମାନଙ୍କ ଦ୍ୱାରା ଯଜ୍ଞକୁଣ୍ଡରେ ଅଗ୍ନି ସ୍ଥାପନ କରାଯାଇଥିଲା । ମଙ୍ଗଳବାର ଦିନ ସୂର୍ଯ୍ୟପୂଜା, ଗୁରୁପୂଜା, ଗୋପୂଜା, ପୀଠଚଣ୍ଡୀ ଯଜ୍ଞ କର୍ମ ଅନୁଷ୍ଠିତ ହୋଇଥିଲା । ସେହିପରି ବୁଧବାର ଦିନ ସୂର୍ଯ୍ୟପୂଜା, ଗୁରୁପୂଜା ସହିତ ୫୦ରୁ ଅଧିକ ଗୋ-ମାତାଙ୍କୁ ଅଣାଯାଇ ସେମାନଙ୍କୁ ସ୍ନାନ କରାଯିବାପରେ ଗୋପୂଜା କରାଯାଇଥିଲା । ଏଥିସହିତ ପୀଠଚଣ୍ଡୀ ଯଜ୍ଞ କର୍ମ ଅନୁଷ୍ଠିତ ହେବାପରେ ସୁନ୍ଦରାକାଣ୍ଡ ପଠନ ଓ ପଣ୍ଡିତମାନଙ୍କ ଦ୍ୱାରା ପାରାୟଣ କରାଯାଇଥିଲା । ଏହି ଉତ୍ସବରେ ତିନିଦିନ ଧରି ଶ୍ରୀରାମ ଭଜନ ସନ୍ଧ୍ୟା ଭଜନ ପରିବେଷଣ କରିଥିଲେ ଓ ନିୟୁ ଷ୍ଟାର ଡ୍ୟାନ୍ସ ଏକାଡେମୀ ତରଫରୁ ନୃତ୍ୟ ପରିବେଷଣ କରାଯାଇଥିଲା । ସଭାପତି ବଟକୃଷ୍ଣ ମହାରଣା ଓ ସମ୍ପାଦକ ଜୟୀରାମ ଦାସଙ୍କ ନେତୃତ୍ୱରେ ବାର୍ଷିକ ଉତ୍ସବକୁ ସୂଚାରୁ ରୂପେ ପରିଚାଳନା କରିଥିଲେ । ଅନ୍ୟମାନଙ୍କ ମଧ୍ୟରେ ମନ୍ଦିରର ମୁଖ୍ୟ ପୂଜକ ରବିନ୍ଦ୍ର ଦାସ, କୋଷାଧ୍ୟକ୍ଷ ଶ୍ରୀକାନ୍ତ ରାୟ, ଭଜହରି ମହାରଣା, ମଥୁରୀ ମହାରଣା, ଗୌରାଙ୍ଗ ବାରିକ, ବୈକୁଣ୍ଠନାଥ ସେଠୀ, ଗୟାଧର ବାରିକ, କିଶୋର ମହାରଣା, ହରେକୃଷ୍ଣ ମହାରଣା, ରତ୍ନାକର ବାରିକ, ମହେଶ୍ୱର ସାହୁ, ଜଗନ୍ନାଥ ବାରିକ ଓ ଗୁଲନଗର ପଞ୍ଚାୟତର ସମସ୍ତ ଗ୍ରାମବାସୀମାନେ ଏହି କାର୍ଯ୍ୟକ୍ରମକୁ ପରିଚାଳନା କରିଥିଲେ । ଏହି ଉତ୍ସବକୁ ଆଖପାଖ ଅଞ୍ଚଳରୁ ହଜାର ହଜାର ଶ୍ରଦ୍ଧାଳୁ ମା’ଙ୍କ ଆର୍ଶୀବାଦ ଭିକ୍ଷା କରିଥିଲେ ।