ୱାଇ୍ଲଡ଼ ଲାଇଫ ଟ୍ରଷ୍ଟ ଅଫ ଇଣ୍ଡିଆ (ଡ଼ବ୍ଲ୍ୟ ଟି ଆଇ )ପକ୍ଷରୁ ସମ୍ପ୍ରତି ଆତଙ୍କ ସୃଷ୍ଟି କରିଥିବା କୁମ୍ଭୀର ଆକ୍ରମଣ ନେଇ ସର୍ଭେ କରାଯିବା ସହିତ ଏ ଦିଗରେ ସଚେତନତା ଅଭିଯାନ ଆରମ୍ଭ କରାଯାଇଛି । ଚଳିତବର୍ଷ କୁମ୍ଭୀର ଆକ୍ରମଣରେ ପଟ୍ଟାମୁଣ୍ଡାଇ ବ୍ଲକରେ ୬ଜଣଙ୍କ ମୃତ୍ୟୁ ହୋଇଥିବାବେଳେ ଏକାଧିକ ଲୋକ ଆହତ ହୋଇଛନ୍ତି । ସମ୍ପ୍ରତି ବିଭିନ୍ନ ନଦନଦୀ ଏପରିକି କେନାଲ ମାନଙ୍କରେ କୁମ୍ଭୀର ଉପଦ୍ରଵ ଦେଖିବାକୁ ମିଳିଛି । ସାଧାରଣ ଜନତାଙ୍କ ସୁରକ୍ଷା ବିପନ୍ନ ହୋଇଥିବାରୁ ଲୋକମାନେ ନଦୀ ମଧ୍ୟକୁ ଯିବାକୁ ଭୟ କରିଛନ୍ତି । କୁମ୍ଭୀର ଆକ୍ରମଣରୁ ସୁରକ୍ଷା ଦେବା ପାଇଁ ବନବିଭାଗର ସମସ୍ତ ଉଦ୍ୟମ ଫଳପ୍ରଦ ହୋଇପାରୁନାହିଁ । ଏଭଳି ଅଭାବନୀୟ ପରିସ୍ଥିତିରେ ଡବ୍ଲ୍ୟଟିଆଇ ଓ ବିକାଶ ସାଥୀ ପକ୍ଷରୁ ବିଗତ ବର୍ଷମାନଙ୍କ କୁମ୍ଭୀର ଆକ୍ରମଣରେ ମୃତ ଓ ଆହତ ସମ୍ପର୍କରେ ସର୍ଭେ କରାଯିବା ସହିତ ଏ ଦିଗରେ ସୁରକ୍ଷିତ ରହିବା ପାଇଁ ସଚେତନତା ଅଭିଯାନ ଆରମ୍ଭ କରାଯାଇଛି I ବିକାଶ ସାଥୀ ପ୍ରତିଷ୍ଠାତା ଡ଼ ବିଶ୍ୱଜିତ ପଣ୍ଡାଙ୍କ ମାର୍ଗଦର୍ଶନ ଓ ଡ଼ବ୍ଲ୍ୟୁଟିଆଇ ପ୍ରକଳ୍ପ ମୁଖ୍ୟ ରୁତିକା ନାଥଙ୍କ ନେତୃତ୍ୱରେ ରାଜେଶ ମହାରଣା,କାହ୍ନI ନାୟକ, ହୃଷିକେଶ ନାଥ, ମହେଶ୍ୱର ଲେଙ୍କା, ଧୀରେନ୍ଦ୍ର ପ୍ରଧାନ,ଶ୍ରବଣ କୁମାର ସାମଲ ପ୍ରମୁଖ ପଟ୍ଟାମୁଣ୍ଡାଇ ବ୍ଲକର କୁମ୍ଭୀର ଉପଦୃତ ବିଭିନ୍ନ ଗ୍ରାମକୁ ଯାଇ କୁମ୍ଭୀର ଆକ୍ରମଣରେ ମୃତ ଓ ଆହତ ପରିବାରକୁ ଭେଟି କୁମ୍ଭୀର ଆକ୍ରମଣର ବିଭିନ୍ନ ଦିଗ ଓ ସୁରକ୍ଷା ତଥା ସତର୍କତା ଉପରେ ଆଲୋଚନା କରିଥିଲେ । ଏହି ଟିମ କୁମ୍ଭୀର ଆକ୍ରମଣରେ ୨୦୨୩ମସିହାରେ ମୃତ୍ୟୁବରଣ କରିଥିବା ଶାସନ ପଂଚାୟତ ନିମପୁର ଗ୍ରାମର ଆଶୁତୋଷ ଆଚାର୍ଯ୍ୟ ପରିବାରକୁ ଭେଟି ଆଲୋଚନା କରିବା ସହିତ ସବିଶେଷ ତଥ୍ୟ ହାସଲ କରିଥିଲେ । ଏଥି ସହିତ ଏହି ଟିମ ଆଳି ବ୍ଲକ ପତ୍ରପୁର ଗୋପାଳପୁର ବ୍ରାହ୍ମଣୀ ନଦୀ କୂଳରେ ପହଂଚି କୁମ୍ଭୀର ପ୍ରତି ସତର୍କ ରହିବାକୁ ନିବେଦନ କରି ବ୍ୟାନର ମାଧ୍ୟମରେ ଲୋକମାନଙ୍କ ମଧ୍ୟରେ ଜନସଚେତନତା ସୃଷ୍ଟି କରାଯାଇଥିଲା । ଆଗାମୀଦିନରେ ପଟ୍ଟାମୁଣ୍ଡାଇ, ରାଜନଗର, ଆଳି, ରାଜକନିକା ଆଦି ଜିଲ୍ଲାର ବିଭିନ୍ନ ବ୍ଲକରେ ସର୍ଭେ ଓ ସଚେତନତା କାର୍ଯ୍ୟକ୍ରମକୁ ଜୋର ଦାର କରାଯିବ ବୋଲି ପ୍ରକଳ୍ପ ମୁଖ୍ୟ ରୁତିକା ନାଥ ସୂଚନା ଦେଇଛନ୍ତି ।
