ବାଣ ନଫୁଟାଇ ରାସ୍ତା ମରାମତି କଲେ , ହାଟପାଟଣା ଗ୍ରାମବାସୀଙ୍କ ନିଆରା ଦୀପାବଳି

ପଟ୍ଟାମୁଣ୍ଡାଇ ୧/୧୧ -ପଟ୍ଟାମୁଣ୍ଡାଇ ନିକଟସ୍ଥ ହାଟପାଟଣା ଗ୍ରାମବାସୀ ପବିତ୍ର ଦୀପାବଳି ଉତ୍ସବକୁ ନିଆରା ଢଙ୍ଗରେ ପାଳନ କରି ଏକ ଉଦାହରଣ ସୃଷ୍ଟି କରିଛନ୍ତି । ସମ୍ପ୍ରତି ବାୟୁ ପ୍ରଦୂଷଣ ଏକ ଆହ୍ୱାନ ଭାବେ ଦେଖା ଦେଇଥିବାରୁ ପ୍ରଦୂଷଣ ରୋକିବା ସହିତ ସମାଜକୁ ଭିନ୍ନ ବାର୍ତା ଦେବା ପାଇଁ ହାଟପାଟଣା ଗ୍ରାମବାସୀ ଆଜି ନିଆରା ପ୍ରୟାସ କରିଥିଲେ । ଦୀପାବଳିରେ ବାଣ ନଫୁଟାଇ ସେଇ ଅର୍ଥରେ ଗୋଡି ସିମେଂଟ କିଣି ଗ୍ରାମବାସୀ ନିଜ ଗାଁ ରାସ୍ତା ମରାମତି କରିବା ପାଇଁ ଏକାଠି ହୋଇଥିଲେ । ସମସ୍ତଙ୍କ ଶ୍ରମ ଦାନରେ ଗାଁ ରାସ୍ତା ମରାମତି ହୋଇପାରିଛି । ଦୀପାବଳିରେ ଏଭଳି ନିଆରା ପ୍ରୟାସ ଓ ଅନନ୍ୟ ଉଦାହରଣ ସବୁ ମହଲରେ ଚର୍ଚ୍ଚାର ବିଷୟ ହୋଇଛି । ଏଠାରେ ସୂଚନା ଯୋଗ୍ୟ ଯେ ଗାଁ ରାସ୍ତା ମରାମତି ପାଇଁ ସରକାର ଓ ପ୍ରଶାସନ ନିକଟରେ ବାରମ୍ବାର ଗୁହାରି ସତ୍ୱେ ଗାଁ ରାସ୍ତା ମରାମତି ନହୋଇ ପାରିବାରୁ ଗ୍ରାମବାସୀ ଏକ ହୋଇ ଏଭଳି ଅଭିନ୍ୱ ପ୍ରୟାସ କରିଛନ୍ତି ।