ନିର୍ବାଚନ କମିଶନରଙ୍କ ନିର୍ଦ୍ଦେଶକୁ ଫୁ : ବିଜେଡି ମିଶ୍ରଣ ପର୍ବରେ ସରକାରୀ ବାବୁ

କେନ୍ଦ୍ରାପଡ଼ା, ୬/୫ : ନିର୍ବାଚନ ପାଇଁ ବିଶେଷ କରି ରାଜନୈତିକ ଦଳ ଏବଂ ସରକାରୀ ପଦବୀରେ ଥିବା ଅଧିକାରୀଙ୍କୁ ଆଦର୍ଶ ଆଚରଣବିଧି ଦେଇ ନିର୍ଦ୍ଦେଶନାମା ଜାରି କରିଛନ୍ତି ନିର୍ବାଚନ କମିଶନ । କିନ୍ତୁ କମିଶନଙ୍କ ନିର୍ଦ୍ଦେଶ ଫୁ କରି ଶାସକ ବିଜୁ ଜନତା ଦଳ ପ୍ରେମରେ ବାୟା ହେଉଛନ୍ତି ଅନେକ ସରକାରୀ ଅଧିକାରୀ । କେନ୍ଦ୍ରାପଡା ଜିଲ୍ଲାର ମହାକାଳପଡା ନିର୍ବାଚନ ମଣ୍ଡଳୀରେ ଦୁଇଟି ରୋଚକ ଘଟଣା ସାମନାକୁ ଆସିଛି । ନିର୍ବାଚନ କମିଶନଙ୍କ ନିର୍ଦ୍ଦେଶକୁ ଉଲଂଘନ କରି ଜଣେ ସରକାରୀ ବାବୁ ବିଜେଡି ମିଶ୍ରଣ ପର୍ବରେ ସିଧା ଦଳରେ ଯୋଗ ଦେଇଥିବା ବେଳେ ଅନ୍ୟଜଣେ ସରକାରୀ ବାବୁ ବିଜେଡି ନେତା ଏବଂ କର୍ମୀଙ୍କ ଗହଣରେ ବସି ଦଳୀୟ ପ୍ରଚାର ଓ ଭୋଟ ସଂଗ୍ରହରେ ଲାଗି ପଡିଛନ୍ତି । ସାମାଜିକ ଗଣମାଧ୍ୟମରେ ଏହି ଦୁଇ ସରକାରୀ ବାବୁଙ୍କର ଭିଡିଓ ଓ ଫଟୋ ଭାଇରାଲ ହେବାରେ ଲାଗିଛି । ପ୍ରଥମଟି ମହାକାଳପଡା ବିଜେଡି କାର୍ଯ୍ୟାଳୟର ଫଟୋ । ମ ହାକାଳପଡା ବ୍ଲକର ତେରଗାଁ ପଞ୍ଚାୟତରେ ହେଉଥିବା ମିଶ୍ରଣ ପର୍ବରେ ଜଣେ ସରକାରୀ ବାବୁ ଯୋଗଦାନ କରି ବିଜେଡି ପାଇଁ କାର୍ଯ୍ୟ କରୁଛନ୍ତି । ସରକାରୀ ତହବିଲରୁ ଦରମା ବି ନେଉଛନ୍ତି । ସେହିପରି ଦ୍ୱିତୀୟଟି ମାର୍ଶାଘାଇର ଏକ ପେଟ୍ରୋଲ ପମ୍ପରେ ନିର୍ବାଚନ ପରିପ୍ରେକ୍ଷୀରେ ଖୋଲାଯାଇଥିବା କାର୍ଯ୍ୟାଳୟରେ ଜଣେ ସରକାରୀ ବାବୁ ବିଜେଡି ନେତା ଓ କର୍ମୀଙ୍କ ଗହଣରେ ବସି ବିଜୁ ଜନତା ଦଳ ସପକ୍ଷରେ ଭୋଟ ଯୋଗାଡ ପାଇଁ କାର୍ଯ୍ୟ କରୁଥିବାର ଫଟୋ ଭାଇରାଲ ହେଉଛି । ଏହି ଦୁଇଟି ଘଟଣାରେ ସରକାରୀ ପଦବୀରେ ଥାଇ ଶାସକ ଦଳ ଏବଂ ନେତାମନ୍ତ୍ରୀଙ୍କ ସହ ସାମିଲ ହେବା, ସରକାରୀ ବାବୁଙ୍କ ବିରୋଧରେ ରାଜ୍ୟ ମୁଖ୍ୟ ନିର୍ବାଚନ କମିଶନ, କେନ୍ଦ୍ରାପଡା ଜିଲ୍ଲା ନିର୍ବାଚନ ଅଧିକାରୀ ତଥା ଜିଲ୍ଲାପାଳଙ୍କୁ ଅଭିଯୋଗ କରାଯାଇଛି ।