ପିଏମ୍ ଶ୍ରୀ କେନ୍ଦ୍ରୀୟ ବିଦ୍ୟାଳୟରେ ଜେଜେ-ଜେଜେମା, ଅଜା-ଆଈ ଦିବସ ପାଳିତ

କେନ୍ଦ୍ରାପଡ଼ା,୧୫ା୧୨: କେନ୍ଦ୍ରାପଡା ପିଏମ୍ ଶ୍ରୀ କେନ୍ଦ୍ରୀୟ ବିଦ୍ୟାଳୟରେ ଜେଜେ-ଜେଜେମା, ଅଜା-ଆଈ ଦିବସ ୧୪ ତାରିଖ ଶନିବାର ପାଳିତ ହୋଇଯାଇଛି । ପ୍ରାଥମିକ ବିଭାଗର ସମସ୍ତ ଛାତ୍ରଛାତ୍ରୀଙ୍କର ଜେଜେ, ଜେଜେମା ଏବଂ ଅଜା-ଆଈ ଏହି ଉତ୍ସବର ନିମନ୍ତ୍ରିତ ଅତିଥି ରୂପେ ଦୀପ ପ୍ରଜ୍ଜ୍ୱଳନ କରିଥିଲେ । ବିଦ୍ୟାଳୟର ପ୍ରାଚାର୍ଯ୍ୟ ଶଶି କୌଶଲ ସମସ୍ତଙ୍କୁ ସ୍ୱାଗତ କରିଥିଲେ । କୁନି କୁନି ପିଲାମାନେ ଜେଜେ-ଜେଜେମାଙ୍କୁ ପୁଷ୍ପ, ତିଳକ ପ୍ରଦାନ ପୂର୍ବକ ପାଦ ସ୍ପର୍ଶକରି ଆଶୀର୍ବାଦ ଭିକ୍ଷା କରିଥିଲେ । ବିଭିନ୍ନ ନୃତ୍ୟ, ସଙ୍ଗୀତ ଓ ନାଟକ ଦ୍ୱାରା ସମସ୍ତଙ୍କର ମନୋରଞ୍ଜନ କରିଥିଲେ । ସମାଜରେ ବୟୋଜ୍ୟେଷ୍ଠ ଲୋକମାନଙ୍କର ଭୂମିକା ଏବଂ ଛାତ୍ରଛାତ୍ରୀମାନଙ୍କର ଚରିତ୍ର ଗଠନରେ, ନୈତିକତା ନିର୍ମାଣରେ, ସୃଜନଶୀଳତାର ବିକାଶରେ ଜେଜେ-ଜେଜେମା କିପରି ମହତ୍ୱପୂର୍ଣ୍ଣ ଭୂମିକା ନେଇପାରିବେ ସେ ବିଷୟରେ ବିଦ୍ୟାଳୟର ପ୍ରଧାନ ଶିକ୍ଷକ ଶିବରଞ୍ଜନ ସାହୁ ଉପସ୍ଥିତ ୨୫୦ରୁ ଉର୍ଦ୍ଧ୍ୱ ଜେଜେ-ଜେଜେମାଙ୍କୁ ବୁଝାଇଥିଲେ । ସଂସ୍କାର ବିନା ଶିକ୍ଷା, ବିବେକହୀନ ବୁଦ୍ଧି ଏବଂ କୌଶଳ ନିରର୍ଥକ । ତେଣୁ ପୁରାଉତନ ସଂସ୍କୃତି ଓ ପରମ୍ପରାର ବାହକ ବୃଦ୍ଧ ଅଜା-ଆଈଙ୍କ ସମ୍ମାନରେ ସମାଜର ମୂଳଦୁଆ ମଜବୁତ୍ ହେବ ବୋଲି କହି ପ୍ରଧାନ ଶିକ୍ଷକ ଛାତ୍ରଛାତ୍ରୀଙ୍କୁ ବୃଦ୍ଧ ଲୋକମାନଙ୍କ ସମ୍ମାନ ଓ ଯତ୍ନ ନେବା ପାଇଁ ଶପଥ କରାଇଥିଲେ । ବିଦ୍ୟାଳୟର ସମସ୍ତ ଶିକ୍ଷକ, ଶିକ୍ଷୟିତ୍ରୀ ଉପସ୍ଥିତ ରହି କାର୍ଯ୍ୟକ୍ରମକୁ ପରିଚାଳନା କରିଥିଲେ ।