କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଅଂଚଳ ଦେଇ ପ୍ରବାହିତ ୨୦କିମି ବ୍ୟାପୀ ଗୋବରୀ ନଦୀ କ୍ରମଶଃ ପୋତି ହୋଇପଡୁଛି । ନଦୀ ପୋତି ହୋଇପଡିଥିବା ବେଳେ ଏହାର ପୁନରୁଦ୍ଧାର ପାଇଁ ଜନସାଧାରଣ ଓ ବିଭିନ୍ନ ସଂଗଠନମାନଙ୍କ ପକ୍ଷରୁ ବାରମ୍ବାର ଦାବି ହେବା ପରେ ନଦୀର ପୁନରୁଦ୍ଧାର ପାଇଁ ୨୦୧୦ ଓ ୨୦୨୨ରେ ଖନନ ଯୋଜନା କାର୍ଯ୍ୟକାରୀ ହୋଇ ୧୦.୫୫ କୋଟି ଟଙ୍କା ବ୍ୟୟ କରାଗଲା । ମାତ୍ର ଏବେ ଗୋବରି ନଦୀ ପୂର୍ବ ଭଳି ପୋତିହୋଇ ରହିିଥିବା ବେଳେ ଜବରଦଖଲ କାରୀ ମାନେ କୋଠାବାଡି କରିବାରେ ଲାଗିପଡିଛନ୍ତି । ରାଜ୍ୟ ସରକାର ଖନନ କରିବା ତ ଦୂରରେ ଥାଉ, ଗୋବରୀ ନଦୀକୁ ବଂଚାଇ ରଖିବା ପାଇଁ ଆଦୌ ପଦକ୍ଷେପ ନେଲେ ନାହିଁ । ଶେଷରେ ଏହାର ନଦୀ ପଠାକୁ ଧୀରେ ଧୀରେ ମାଫିଆମାନେ କବଜାକୁ ନେବା ଆରମ୍ଭ କରିଛନ୍ତି । ନଦୀର କିସମ ବଦଳାଇ ହେକ୍ଟର ହେକ୍ଟର ଜମିକୁ ଅନାୟାସରେ ସେମାନେ ବିକ୍ରି କରି ଚାଲିଛନ୍ତି । ନଦୀର ଶୁଖିଲା ଅଂଶକୁ ଜବର ଦଖଲ କରି ବେଆଇନ ଭାବେ ମହଲା ପରେ ମହଲା କୋଠା ନିର୍ମାଣ କରାଯାଉଛି । ସୂଚନା ମୁତାବକ, ଗୋବରୀ ନଦୀ ଲୁଟ୍ ପଛରେ ଜିଲ୍ଲା ପ୍ରଶାସନ ଓ ସ୍ଥାନୀୟ ପ୍ରଶାସନର କିଛି କମ୍ ଭୂମିକା ନାହିଁ ବୋଲି ସଧାରଣରେ ମତପ୍ରକାଶ ପାଉଛି । ଏହି ନଦୀର ଉତ୍ପତି ସ୍ଥଳ ବ୍ରାହ୍ମଣୀ ସଂଜୋଗ ପଥକୁ ୧୮୬୮ ମସିହାରେ ବ୍ରିଟୀସ ସରକାର ବନ୍ୟା ନିୟନ୍ତ୍ଣ ପାଇଁ ବନ୍ଧ ନିର୍ମାଣ କରିବା ସହିତ ବନ୍ୟା ଜଳ ଗୋବରୀ ନଦୀ ଦେଇ ସମୁଦ୍ରକୁ ନିସ୍କାଶନ ପାଇଂ ଏକ ପଥ ରଖିଥିଲେ । ମାତ୍ର ଜଳସମ୍ପଦ ବିଭାଗ ଛଅ ଦଶନ୍ଧି ତଳେ ଏକ ବେଆଇନ ବନ୍ଧ ନିର୍ମାଣ କରି ନଦୀର ସ୍ରୋତକୁ ପ୍ରଥମେ ପ୍ରତିହିତ କରିଥିଲେ । ପରବର୍ତୀ ସମୟରେ ସରକାର ଗୋବରୀ ନଦୀ ଉପରେ ପରିବହନ ବିଭାଗ ଦ୍ୱାର ହାଲ୍ ପ୍ଲଟ- ୧୩୨୯ ରେ ପଟ୍ଟାମୁଣ୍ଡାଇ ବସଷ୍ଟାଣ୍ଡ କୋଠା ନିର୍ମାଣ କରାଯାଇଥିଲା । ପରେ ପ୍ଲଟ ନଂ- ୨୦୪୯ ଆଉ ୨୦୫୦ ଗ୍ରାମ୍ୟ ଉନ୍ନୟନ ବିଭାଗ ଓ ୨୦୪୩ ଆଉ ୨୦୪୬ ପଂଚାୟତ ସମିତି, ୩୬୦୩ ରେ ତେରଜୋଡି, ୨୦୪୭ , ୨୦୪୮ ରେ ପ୍ରାଣୀ ଚିକିତ୍ସା କେନ୍ଦ୍ର, ସାବିକ ପ୍ଲଟ ନଂ- ୧୦୭୬ ବିଦ୍ୟୁତ ବିଭାଗ ଅଫିସ ଓ ହାଲ,୩୬୦୨ ରେ ଦୂରସଂଚାର କୋଠା ନଦୀ ଉପରେ ନିର୍ମାଣ ହୋଇଥିବା ବେଳେ ଦକ୍ଷିଣଦିଆ ମୌଜାରେ ବ୍ଲକ କଲୋନି ମଧ୍ୟ ନିର୍ମାଣ କରାଯାଇଛି । ମାତ୍ର ଉଦ୍ବେଗଜନକ ଭାବେ ଏକାଧିକ ସରକାରୀ କୋଠା ଓ ବେସରକାରୀ କୋଠା ମଧ୍ୟ ଏହି ନଦୀ ଉପରେ ନିର୍ମାଣ କରାଯାଇଥିବା ଅଭିଯୋଗ ସାମ୍ନାକୁ ଆସିଛି । ନିକଟରେ ନଦୀ ପଠାର କିସମ ବଦଳାଇ ଏହା ଉପରେ ଏକ ବିରାଟ କାୟ ଇଣ୍ଡୋର ଷ୍ଟାଡିୟମ ନିର୍ମାଣ କରାଯାଉଛି । ସରକାରୀ ଦପ୍ତର ମାନ ଗଢାହେଉଥିବାରୁ ନଦୀ ପୁନଃ ଉଦ୍ଧାର ହେବନାହିଁ ବୋଲି ଜାଣି ଏହାର ଫାଇଦା ନେଇ ଜମି ମାଫିଆ ଓ ପ୍ରଭାବଶାଳୀ ଲୋକ ନଦୀକୁ ଜବରଦଖଲ କରି ପଟ୍ଟାମୁଣ୍ଡାଇ ବଜାର ସଂଲଗ୍ନ ବେଲତଳ, ଦକ୍ଷିଣଦିଆ, ପୋଖରିଆପଡା ମୌଜାର ଗୋବରୀ ନଦୀର ଜମିକୁ ହଡପ କରି ନିଜେ କୋଠା ନିର୍ମାଣ କରି ଭଡା ଦେବା ସହ ପ୍ଲଟ କରି ବିକ୍ରୀ କରି ଚାଲିଛନ୍ତିା ୧୯୩୦ ମସିହାରେ ହୋଇଥିବା ବନ୍ଦୋବସ୍ତରେ ବ୍ୟାପକ ହେରଫେର ଓ ଚଂଚକତା କରି ସରକାରୀ ଜମି ଓ ଡିଷ୍ଟବୋର୍ଡ ଜାଗା ହଡପ କରି ନେଇଛନ୍ତି । ପରବର୍ତୀ ସମୟରେ ୧୯୮୪ ଚକବନ୍ଦୀରେ ନିଜ ନାମରେ ପଟ୍ଟା କରାଇ ନେବାକୁ ସକ୍ଷମ ହେଉଥିଲେ ମଧ୍ୟ ଜିଲ୍ଲା ପ୍ରଶାସନ ସେ ଦିଗରେ ଆଦୌ ଦୃଷ୍ଟି ଦେଉ ନାହାନ୍ତି ବୋଲି ସ୍ଥାନିୟ ଲୋକେ ଅଭିଯୋଗ କରୁଛନ୍ତି । ବର୍ତମାନ ନଦୀରେ ଜଳ ପ୍ରବାହ ନାହିଁ । ଶଯ୍ୟା ପୋତି ହେବାରେ ଲାଗିଛି । ଯେଉଁ ମାନେ ଜବର ଦଖଲକାରୀଙ୍କ ପାଖରୁ ଜାଗା କିଣିଛନ୍ତି ସେମାନେ ତହସିଲ ଦୌଡିଦୌଡି ପଟ୍ଟା ପାଉନାହାଁନ୍ତି ବୋଲି ଅଭିଯୋଗ କରୁଛନ୍ତିି ।ଏଭଳି ସ୍ଥିତି ପଟ୍ଟାମୁଣ୍ଡାଇ ଅଂଚଳରେ ଲାଗି ରହିଥିବା ବେଳେ ପଟ୍ଟାମୁଣ୍ଡାଇ ଆଇନସେବା ପ୍ରାଧିକରଣ ସଭ୍ୟ ପ୍ରଫୁଲ୍ଲ ଦାଶ, ଦେବାଶିଷ ପଣ୍ଡା, କ୍ଷିରୋଦ ମଲ୍ଲିକ, ଅଶୋକ ବଳ ପ୍ରମୁଖ ପ୍ରମୁଖ ଜାତୀୟ ଆଇନ ସେବା ପ୍ରାଧିକରଣ (ନାଲସା) ନିକଟରେ ଏକ ଜନସ୍ୱାର୍ଥ ସମ୍ବଳିତ ଅଭିଯୋଗ କରିଥିଲେ । ଅଭିଯୋଗକୁ ବିଚାର କରି ଏ ସମ୍ପର୍କରେ ପଦକ୍ଷେପ ନେବାକୁ ଜଳସମ୍ପଦ ବିଭାଗର ସର୍ବୋଚ୍ଚ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି । ମାତ୍ର ଏହାର କୋଣସି ପଦକ୍ଷେପ ନିଆଯାଇନାହିଁ । ଏବାବଦରେ ତହସିଲଦାର ଦିଲ୍ଲିପ ସେଠୀଙ୍କୁ ଯୋଗାଯୋଗ କରିବାରୁ ସେପରି କିଛି ଅଭିଯୋଗ ଆସିନାହିଁ । ପଟ୍ଟା ଦେବା ବିଷୟଟି ସରକାରୀ ଗାଇଡଲାଇନରେ ନ ଆସୁଥିବାରୁ ପଟ୍ଟା ଦିଆଯାଇ ପାରୁନାହିଁ । ୨୦ କିମି ବ୍ୟାପି ଗୋବରୀ ନଦୀ ଦୀର୍ଘ ଦିନ ଧରି ଜୀବିତ ରହିଥିଲା । ଉପଯୁକ୍ତ ରକ୍ଷଣାବେକ୍ଷଣ ଯୋଗୁଁ ଏବେ ସମ୍ପୂର୍ଣ୍ଣ ନଦୀଟି ମରିବାକୁ ବସିଲାଣି । ନଦୀରେ ସ୍ରୋତ ଆସୁନଥିବାରୁ ସେସବୁ ନଦୀପଠା ଜବରଦଖଲ ହେଉଛି । ବିଭିନ୍ନ କାରଣରୁ ନଦୀରେ ପାଣି କମି କମି ଚାଲିଛି ଜଳସ୍ତର କମିକମି ଯାଉଛି ବୋଲି ଗବେଷକ ଦେଇଥିବା ରିପୋର୍ଟ ଏବେ ପରିବେଶବିତ୍ଙ୍କ ପାଇଁ ଚିନ୍ତାର କାରଣ ହୋଇଛି । ମୃତ ଗୋବରୀ ନଦୀର ନବୀକରଣ ନିମନ୍ତେ ସେମାନେ ଦେଇଥିବା ପ୍ରସ୍ତାବ କାର୍ଯ୍ୟକାରୀ କରାଯିବା ଉପରେ ଏବେ ବିଭିନ୍ନ ମହଲରେ ମତପ୍ରକାଶ ପାଇଲାଣି ।
