ମଣିଷ ଜୀବନରେ ମୃତ୍ୟୁ କେତେବେଳେ ଓ କେମିତି ଆସେ ତାହା କେହି କହିପାରିବେନି। ଏମିତି ଏକ ମୃତ୍ୟୁ ମଣିଷ ଜୀବନରେ ଘଟିଛି ଯେ ପୁତୁରାର ଶବ ସତ୍କାର କରିବାକୁ ଯାଇ ବଡବାପାର ହୁଦଘାତରେ ମୃତ୍ୟୁ ହୋଇଛି । ଏଭଳି ଦୁଃଖଦ ଘଟଣା ପଟ୍ଟାମୁଣ୍ଡାଇ ଅଂଚଳରେ ଚର୍ଚ୍ଚାର ବିଷୟ ପାଲଟିଥିବା ବେଳେ ଶୋକର ଛାୟା ଖେଳାଇ ଦେଇଛି ।
କେନ୍ଦ୍ରାପଡା ଜିଲ୍ଲା ପଟ୍ଟାମୁଣ୍ଡାଇ ବ୍ଲକ ବାଲିଝାରୀ ଗ୍ରାମର ଗଗନବିହାରୀ ମହାନ୍ତିଙ୍କ ଏକମାତ୍ର ପୁଅ ରୁଦ୍ର ପ୍ରସାଦ ମହାନ୍ତି (୨୪) କୋରାପୁଟରେ ପିଉସୀ ମା ଘରେ ରହି ବିଏସି ପଢୁଥିଲେ । ଗତ ୧୫ତାରିଖ ଦିନ କୋରାପୁଟ-ଜୟପୁର ମଧ୍ୟରେ ରେଳ ଧାରଣରୁ ଦୁଇଜଣ ଯୁବକଙ୍କ କ୍ଷତାକ୍ତ ମୃତ ଦେହ ଉଦ୍ଧାର କରାଯାଇଥିଲା । ଏହା ହତ୍ୟା ନାଁ ଆତ୍ମହତ୍ୟା ସନ୍ଦେହ ହେବାରୁ ଜିଆରପି ପକ୍ଷରୁ ୧୬/୨୩ରେ ମାମଲା ରୁଜୁ କରାଯାଇ ତଦନ୍ତ ଜାରୀ ରହିଛି । ପରେ ସେମାନଙ୍କ ଶବ ନିକଟରୁ ମିଳିଥିବା ମନିପର୍ସ ଓ ଏଟିଏମ କାର୍ଡରୁ ପଟ୍ଟାମୁଣ୍ଡାଇ ବାଲିଝରୀ ଗାଁର ରୁଦ୍ର ପ୍ରସାଦ ମହାନ୍ତି ବୋଲି ଚିହ୍ନଟ କରାଯାଇଥିଲା ।ଏଥିନେଇ ଜିଆର ପୋଲିସ ପଟ୍ଟାମୁଣ୍ଡାଇ ଘରକୁ ଖବର ଦେଇଥିଲେ । ପୁଅର ମୃତ ଖବର ପାଇ ପଟ୍ଟାମୁଣ୍ଡାଇ ଏକ ଗାଡ଼ିରେ ରୁଦ୍ରର ବାପା, ବଡ଼ବାପା, ଦାଦା ଓ ଗ୍ରାମରୁ କିଛି ବ୍ୟକ୍ତି ସେଠାକୁ ଯାଇଥିଲେ । ଶବ ବ୍ୟବଚ୍ଛେଦ ପରେ ପୁରୀ ସ୍ୱର୍ଗଦ୍ୱାରକୁ ସଂସ୍କାର ପାଇଁ ଅଣାଯାଇଥିଲା । ପରିବାର ଲୋକେ ସେହି ଶବ ସତ୍କାରରେ ଯୋଗଦେବା ପାଇଁ ପୁରୀରେ ପହଂଚିଥିଲେ । ରୁଦ୍ରର ଶବ ସତ୍କାର କରାଯାଇଥିଲା । ସତ୍କାର ପରେ ସମସ୍ତେ ସମୁଦ୍ରରୁ ପାଣି ଛିଚିଂ ହୋଇ ଉପରକୁ ଉଠିବା ମାତ୍ରେ ରୁଦ୍ରର ବଡବାପା ତ୍ରୈଲୋକ୍ୟ ମହାନ୍ତି ହୃଦଘାତର ଶିକାର ହୋଇ ଟଳି ପଡିଥିଲେ । ପୁରୀ ଜିଲ୍ଲା ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା । ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୁତୁରାର ଶବ ସତ୍କାର କରିବାକୁ ଯାଇ ବଡବାପା ଶବ ପାଲଟି ଯାଇଥିଲେ ।ଏଭଳି ଦୁଃଖଦ ଖବର ପଟ୍ଟାମୁଣ୍ଡାଇ ଅଂଚଳରେ ଶୋକର ଛାୟା ଖେଳାଇ ଦେଇଛି ।
